ផ្លែក្រូចជាផ្លែឈើអច្ឆរិយៈ ដោយហេតុផលប្រាំយ៉ាង
2016-06-17 02:34:50 PM
Share
ផ្លែក្រូចបានក្លាយត្រូវបានចាត់ទុកថាជាផ្លែឈើអច្ឆរិយៈ ដោយសារតែវាមានប្រយោជន៍ច្រើន ក្រាស់ក្រែល ដែលប្រសិនបើអ្នកញ៉ាំវាមួយផ្លៃក្នុងមួយថ្ងៃនោះអ្នកនឹងអាចគេចពីគ្រូពេទ្យបានហើយ (លែងឈឺ)។នេះគឺជាការពិត ដែលត្រូវបានធានាអះអាងដោយអ្នកវិទ្យាសាស្រ្ដជំនាញៗ។ ដូចលោកអ្នកធ្លាប់ដឹងហើយថា រាងកាយរបស់យើងត្រូវការចាំបាច់នូវវីតាមីនA, B ហើយនិងC ដើម្បីឲ្យយើងមានសុខភាពល្អ ហើយវីតាមីនសំខាន់ទាំងបីនេះ គឺស្ថិតនៅក្នុងផ្លែក្រូចទាំងអស់។ ដូច្នេះតើមានមូលហេតុអ្វីខ្លះ ដែលនាំឲ្យផ្លែក្រូចត្រូវគេហៅថាជាផ្លែឈើអច្ឆរិយៈនោះ (Wonder Fruit ឬ Super Food)?
មុននឹងឈានចូលដល់ហេតុផលទាំង៥ ឬអត្ថប្រយោជន៍ធំៗទាំង៥របស់ផ្លែក្រូច ខ្មែរសារិកាសូមបញ្ជាក់ប្រាប់ប្រិយមិត្តទាំងអស់ឲ្យបានជ្រាបថា គ្រាន់តែផ្លែក្រូចមួយផ្លែ មានហ្វាយប៊ើ (fiber) ២,៥៤ក្រាម ហើយរាងកាយរបស់មនុស្សយើង ត្រូវការ១០ភាគរយនៃហ្វាយប៊ើនៅក្នុងរបបអាហារប្រចាំថ្ងៃរបស់យើង។ មិនត្រឹមតែល្បីថាមានវីតាមីន C ច្រើននោះទេ ផ្លែក្រូចក៏ផ្សំទៅដោយសារធាតុសំខាន់ចំពោះរាងកាយចំនួន៦០ប្រភេទ និងសារធាតុគីមីចំនួន១៧០ប្រភេទ ដែលប្រឆាំងនឹងរោគមហារីកទៀតផង។
មិនត្រឹមតែប៉ុណោះទេ ផ្លែក្រូចនូវមានអត្ថប្រយោជន៍ធំៗចំនួន៥យ៉ាងទៀត ដែលនេះគឺជាមួលហេតុទាំង៥ ដែលនាំឲ្យផ្លែក្រូចទៅជាផ្លែឈើអច្ឆរិយៈ។ ហេតុផលទាំង៥យ៉ាងនេះ មានដូចខាងក្រោម៖
១- ផ្លែក្រូចជួយបង្កើនថាមពាលខួរក្បាល៖ ប្រសិនបើអ្នកចង់ឲ្យខួរក្បាលរបស់លោកអ្នកធ្វើការបានល្អជាងមុន សូមកុំភ្លេចញ៉ាំផ្លែក្រូច។ ជាតិវីតាមីនសេ នៅក្នុងផ្លែនេះ នឹងជួយវាយកម្ចាត់នូវរោគរវើរវាយនិងរោគដែលទាក់ទងនឹងសរសៃប្រសាទផ្សេងទៀត។ វីតាមីនសេ រួមផ្សំទៅដោយសារធាតុអាស៊ីតហ្វូលីច ប៉ូតាស្យូម និងសេឡេញ៉ូម នឹងជួយឲ្យកោសិកាខួរក្បាល និងផ្នែកផ្សេងទៀតនៃរាងកាយរបស់អ្នកមានសុខភាពល្អ។
២- ផ្លែក្រូចអាចព្យាបាលជំងឺបាន៖ សម្រាប់អ្នកដែលមានហានីភ័យខ្ពស់ក្នុងការកើតជំងឺមហារីក នៅពេលនេះផ្លែក្រូចគឺហាក់ដូចជាកាដូដែលទេវតាប្រទានឲ្យអ្នកដូច្នេះដែរ។ កំពូលផ្លែឈើនេះ មានរួមផ្សំទៅដោយភ្នាក់ងារវាយប្រហារជំងឺមហារីក ដែលអាចជួយការពារអ្នកពីជំងឺដ៏សាហាវនេះបានដល់ពាក់កណ្ដាល។ វាក៏ល្អចំពោះអ្នកដែលរងគ្រោះដោយសារជំងឺបេះដូង ជំងឺហឺត និងជំងឺសន្លាក់ដៃជើងទៀតផង។ មិនត្រឹមតែប៉ុណ្ណោះទេ ការញ៉ាំផ្លែក្រូចមួយផ្លែ នឹងជួយការពារលោកអ្នកពីជំងឺទឹកនោមផ្អែមទៀតផង។ ក្រៅពីនេះ វាក៏អាចជួយបញ្ចុះសម្ពាធឈាម និងកូឡេស្ទេរ៉ូលបានផងដែរ។
៣- ផ្លែក្រូចធ្វើឲ្យអ្នកកាន់តែស្រស់ស្អាត៖ ការញ៉ាំផ្លែក្រូចមួយផ្លែក្នុងមួយថ្ងៃ មិនត្រឹមតែកាត់បន្ថយជំងឺស្រ្ដូកបាន២០% ប៉ុណ្ណោះទេ ប៉ុន្ដែវាក៏អាចជួយឲ្យលោកអ្នកស្រស់ស្អាតទៀតផង។ វានឹងធ្វើឲ្យស្បែកលោកអ្នកក្មេងជាងវ័យ ស្រស់ថ្លា ដោយសារជាតិវីតាមីនសេ។ បន្ថែមលើនេះ វាក៏នឹងមិនធ្វើឲ្យលោកអ្នកធាត់នោះទេ ព្រោះវាជាផ្លែឈើដែលមានកាឡូរីទាប(៤៣) ដែលជាជម្រើសល្អបំផុតសម្រាប់អ្នកដែលចង់ញ៉ាំអាហារដែលកាឡូរីទាប។
៤- ផ្លែក្រូចឆ្ងាញ់ និងងាយស្រួលរក៖ ប្រសិនបើផ្លែក្រូចពិបាកក្នុងការញ៉ាំ ឬមិនមានជាតិអីនោះ វាក៏ប្រហែលជាមិនត្រូវបានគេចាត់ទុកជាកំពូលផ្លែឈើនោះទេ។ រឹតតែពិសេសជាងនេះទៀត លោកអ្នកក៏មិនពិបាកក្នុងការរកទិញនោះដែរ ហើយប្រសិនបើមានឱកាសទៅដល់ចម្ការក្រូចពោធិ៍សាត់ នៅបាត់ដំបងទៀត គឺកាន់តែប្រសើរ។
៥- ផ្លែក្រូចធ្វើឲ្យលោកអ្នកមានអារម្មណ៍សប្បាយ៖ យោងតាមការស្រាវជ្រាវដែលរកឃើញនាពេលថ្មីៗនេះ បានឲ្យដឹងថា សារធាតុនៅក្នុងផ្លែក្រូចអាចធ្វើឲ្យលោកអ្នកមានអារម្មណ៍ថាសប្បាយ។ ការសិក្សាមួយផ្សេងទៀត ក៏បានរកឃើញដែរថា ផ្លែក្រូចអាចជួយឲ្យលោកអ្នកមានការអត់ធ្មត់ខ្លាំងជាងមុន (មិនឆាប់ខឹង) និងទប់អារម្មណ៍បានល្អ។
ដូច្នេះនៅចាំអីទៀត ចាប់ផ្ដើមញ៉ាំផ្លែក្រូចចាប់ពីពេលនេះតទៅ ដើម្បីឲ្យលោកអ្នកទទួលនូវអត្ថប្រយោជន៍ជាច្រើនពីផ្លែឈើអច្ឆរិយៈមួយនេះ៕